Үндістанда тоғыз полицей өлім жазасына кесілді

Үндістанда COVID-19 пандемиясы кезінде қамауда болған әке мен баланың өліміне қатысы бар тоғыз полицей өлім жазасына кесілді, деп хабарлайды ВВС.

58 жастағы П.Жаярадж және оның 38 жастағы ұлы Беникс елдің оңтүстігіндегі Тамилнад штатындағы түрмеде көз жұмды. Олар COVID-19 пандемиясы кезінде карантин талаптарын бұзды деген күдікпен ұсталған еді. Нақтырақ айтқанда, өздерінің ұялы телефон дүкенін ашық ұстағаны үшін қамауға алынған.

Дүйсенбі күні үкім шығарған судья екі ер адамның бір-бірінің көз алдында шешіндіріліп, аса қатыгездікпен соққыға жығылғанын айтып, бұл істі билікті ашық түрде асыра пайдалану деп атады.

— Олар мұны өлтіру ниетімен жасады, — деді судья.

Полицейлер өткен айда кісі өлтірді деп танылған. Олар сот үкіміне шағым түсіре алады.

— Олар қарусыз адамдарға шабуыл жасады. Оларды кешіруге болмайды. Жасы немесе отбасылық жағдайына қарап, жеңіл жаза тағайындауға болмайды. Олардың барлығы — білімді адамдар, — деді судья үкім шығару кезінде.

Жалпы алғанда, әке мен баланың қатыгездікпен өлтірілуіне байланысты он полицей қамауға алынған. Алайда айыпталушылардың бірі 2020 жылы COVID-19 індетінен қайтыс болды.

Бұл оқиға Тамилнадта жаппай наразылық тудырды. Көшеге шыққандардың арасында штаттағы оппозиция депутаттары да болды.

Оппозиция жетекшісі Рахул Ганди мен үнді крикетінің жұлдызы Шикхар Дхаван әлеуметтік желілерде осы екі азаматқа әділдік талап еткендердің қатарында болды.

Бұл өлім оқиғасы Үндістандағы полиция озбырлығы мәселесіне қоғам назарын қайта аудартты.

Құқық қорғау ұйымдарының мәліметінше, Үндістанда жыл сайын жүздеген адам қамауда көз жұмады. Олар күдіктілерден мойындату алу үшін азаптау мен қорлау полиция тәжірибесінің бір бөлігіне айналғанын айтады.

Осы жылдың басында БҰҰ-ның бірнеше сарапшысы Үндістанды полиция қызметін халықаралық адам құқықтары стандарттарына сәйкестендіру үшін ауқымды реформалар жүргізуге шақырған еді.