Елорда тұрғыны «Қазақстан халқына» қорынан баласының еміне ақша ала алмай жүр

Елордалық Ғалымжан Аманқұлов «Қазақстан халқына» қорынан бес жастағы баласының еміне қажетті қаржыны ала алмай жүргеніне шағымданды. Қазір ұлының Барселонада алып жатқан емінің ақысы үшін бірнеше миллион теңге қарызы бар. «Қазақстан халқына» қоры науқастың емделуге өз бетімен кеткендіктен, емге қажетті қаржы бөлу мәселесі қарастырылмайтынын айтқан, деп хабарлайды Halyq Uni тілшісі. 

Ғалымжан Аманқұловтың айтуынша, ұлы Нұрисламға 2019 жылы астаналық дәрігерлер нейробластома диагнозын қойған. Қатерлік ісіктің бұл түрінің Қазақстанда емі жоқ. 

2021 жылдың аяғында «Ана мен бала» орталығы дәрігерлері Ғалымжан Аманқұловқа: «Бұл дерттің әрі қарай емі жоқ. Үйге шығарамыз немесе басқа ауруханаға ауыстырамыз. Онкологияда бала көп, сіздің балаңыздың емі жоқ» деген.

Біз үшін өте ауыр болды. Дәрігерден ондай сөз есту қай ата-анаға болсын ауыр тиетіні айтпаса да түсінікті, – деді ол.

Ата-анасы әлем бойынша нейробластома дертінен жазылған балаларды іздей бастаған. Қазақстаннан үш баланың осы дерттен емделгенін естіп, барып сөйлеседі. Соңында Испанияның Барселона қаласындағы Сант-Жоан Де Деу госпиталімен байланысқа шыққан.

«Пошта арқылы ұлымның қағаздары мен КТ нәтижелерін жібердім. Онымен танысып шығып, баламыздың жағдайы өте ауыр екенін ескертті. Бірақ соңғы шыққан иммунотерапия мен оның накситамаб деген түрі шыққанын айтып, сонымен емдеуге болатынын айтты. Бізге бастапқыда емдеу үшін 328 876 мың еуро қажет екенін айтты. Ол соманы көргенде қатты қорықтым. Теңгеге шаққанда 163 млн теңге, мен үшін мүмкін емес сома. Әлеуметтік желілер арқылы ұлымның еміне ақша жинап бастадым. Бірақ ақша аз жиналды», – деді науқастың әкесі.

Бастапқыда Нұрисламды екі елдің – Испания мен Қазақстанның дәрігерлері бірлесіп емдеген. Испанияның дәрігерлерінің емдеу протоколы Қазақстанда болмағандықтан баланы испан госпиталіне апарып емдеуге тура келді, дейді ол. 

«Емдеу құны қымбат болғандықтан, клиника емдеу ақысын бөліп төлеуге рұқсат берді. Сол кезде Қазақстандағы белгілі қорлар «Ана мен бала» орталығына иммунотерапияның карзиба деген түрін сатып алды. Соны бізге беруді ұсынды. Алайда испан дәрігерлерінің айтуынша, ол препаратты Нұрисламға салуға болмайды. Өйткені ол толық ресмиссияға шыққан науқастарға салынады екен. Сондықтан Испанияға кетуге шешім қабылдадым. Қолымдағы бар ақшамды жинап, өзімнің және інімнің көлігін саттым, үйімді кепілдікке қойып, бас-аяғы 50 мың еуромен Испанияға кеттім», – дейді Ғалымжан.

Айтуынша, шетелде емделгенге дейін ұлы өз бетімен жүріп, тамақ ішіп, тіпті кіші дәретке бара алмаған. Бірінші курстан соң баланың беті бері қарай бастағанын айтады. Қазір тамақты өзі ішіп, дәретке барып, жүреді.

«Емдеудің екінші курсынан кейін біздің ақшамыз таусылды. Мен елге қайтуға мәжбүр болдым. Өйткені ақшасын төлемесек емдеуді жалғастырмайтынын айтты. «Қазақстан халқына» қорына, еліміздің және шетелдік қорларға жаздым. Германия мен Ресейдің қорларынан ақша түсті. Алғашқы үш курс үшін 100 мың еуро төлеген соң маған анықтама беріп, елге қайттым. Алайда 20 мың еуро қарызымыз тұр», – деді ол.

Қазақстанға келіп «Қазақстан халқына» қорына өтініш білдіріп, сондай-ақ елдегі ірі кәсіпкерлерге барып көмек сұрағанын айтады. Алайда соңғылары қайырымдылыққа қаржыны «Қазақстан халқына» қорына аударатынын айтып, шығарып салады дейді. 

«Қазақстан халқына» қоры көмек көрсетуден бас тартты. Бастапқыда «Ана мен бала» орталығынан анықтама жоқ деді. Оны Денсаулық сақтау министрлігі арқылы алып берген едік, 21 шілде күні қордан жауап келді. Онда шетелге емге өз бетімізбен шыққандықтан қаржылай көмек көрсетілмейтінін жазған. Бұл қор бүкіл халықтың ақшасы. Қолымда барлық анықтама, құжат бола тұра неге көмектеспейтінін түсінбеймін. Қай компания, бизнесменге барсам да, қайырымдылыққа қаржыны «Қазақстан халқына» қорына аударатынын айтады. Мен бұл қорға барып, барлық анықтамаларды көрсетіп, жағдайымды түсіндірейін десем қайда отыратынын білмеймін, – деп толықтырды астаналық. 

Ал Қазақстан халқы қоры төрағасының орынбасары Ләззат Шыңғысбаеваның айтуынша, Нұрисламның сырқатын емдеу мемлекеттік бюджетте қарастырылған. 

Шетелде емдеуді қаржыландырудың өзіндік процедурасы бар. Жергілікті жерлерде емдеуге мүмкіндік болмаса, республикалық орталықтарға жолдама беріледі. Ал республикалық орталықтардың мүмкіндігі жетпесе шетелде емдеу үшін Денсаулық сақтау министрлігі жанындағы комиссия шетелде емдеуге мемлекеттік бюджеттен қаражат бөлу жайын қарастырады. Министрліктің өзінің тізімі бар, белгілі бір дерт түрлерін шетелде емдеуге қаражат бөледі. Егер мемлекеттік бюджетте қарастырылмаған жағдай болса ғана «Қазақстан халқы» қоры оларға қаражат бөледі. Ал мемлекеттік бюджетте қарастырылса, біз оған ақша бере алмаймыз, – деді төраға орынбасары. 

Алайда Ғалымжан Аманқұловтың айтуынша, олардың қолдарында Денсаулық сақтау министрлігінің жолдамасы бар. 

Айта кетейік, Ғалымжанның Нұрисламнан бөлек тағы үш баласы бар. Қазір олар Түркістан облысының Мақтарал ауданында тұратын ата-әжесіне апарып тастаған. Бірнеше айдан бері балаларына жете алмай жүргенін айтады. Өйткені ары-бері жүруге қаржы тапшы. Ал жұбайы мен науқас баласы Барселонада пәтер жалдап тұрып жатыр. Емнен бөлек, айынан 1 млн теңге пәтерақысы тағы бар. 

«Осы тұрғанда «Самұрық-Қазына» қорының өкілдеріне барып келдім. Олар қайырымдылық мақсаттағы қаржыны Аружан Саинның қорына аударамыз дейді. Аружан Саин да көмектесуден бас тартты. Себебі ДСМ жұмыс органы бар, шетелге кетпес бұрын сонда тіркелу керек екен. Біз шетелге емделуге қаңтар айының соңында кеттік. Ол кезде «Қазақстан халқы» қоры енді ашылып жатқан еді. Мен Қазақстанның дәрігерлерін жамандап отырған жоқпын. Бізде ол ем жоқ. Президентімыз Тоқаев қор науқас балаларға көмектесу керек деп айтты. Қазір балам жақсы болып келеді. Әрі қарай емдемесе, дерті асқынып кете ме деп қорқам», – деп қорытындылады Ғалымжан Аманқұлов.