Өзгерістер өзегі – ұлттық мүдде: «Ақ жол» сайлауалды науқанды қалай бастады

“Ақ жол” партиясы: 

✅-сапалы білім беру жүйесін дамытуға, 

✅-медициналық қызметтің қолжетімділігін арттыруға, 

✅-жаңа жұмыс орындарын ашуға;

✅-тұрғын үй мәселесін шешуге;

✅-азаматтарды жалғыз баспанасынан айыруға заң жүзінде толық тыйым салуға;

✅-жас отбасылар мен жастарды қолдауға; 

✅ Шағын және орта бизнесті дамытуға басымдық береді.

Қазақстандағы кезекті сайлау науқаны елдің саяси өміріндегі маңызды кезеңдердің бірі саналады. Әсіресе жаңа Конституция аясында өтіп жатқан бұл саяси дода партиялар үшін ғана емес, қоғам үшін де жаңа саяси мәдениеттің қалыптасуына мүмкіндік береді. Осындай жағдайда «Ақ жол» демократиялық партиясының сайлауалды үгіт-насихат науқанын бастауы оның алдағы кезеңге арналған саяси басымдықтары мен ел дамуына қатысты көзқарасын тағы бір мәрте айқындап берді.

Партия республикалық деңгейдегі науқанды Алматы қаласында салтанатты түрде бастап, еліміздің барлық өңірлерімен телекөпір ұйымдастырды. Бұл тек техникалық шешім емес, саяси тұрғыдан партияның бүкіл республика аумағында біртұтас жұмыс жүргізуге дайын екенін көрсететін символдық қадам болды. Науқанның алғашқы күнінен-ақ өңірлік филиалдардың қатар іске кірісуі сайлауалды жұмыстың орталықтандырылған әрі жүйелі түрде ұйымдастырылғанын аңғартады.

Партия төрағасы Дания Еспаева сөйлеген сөзінде жаңа Конституция негізінде өтіп жатқан сайлаудың тарихи маңызын атап өтті. Оның айтуынша, «Ақ жолдың» басты мақсаты – ұлттық мүддені қорғауға, әділетті қоғам қалыптастыруға және экономикалық дамуды қамтамасыз етуге бағытталған нақты реформаларды жүзеге асыру. Бұл ұстаным партияның бұрыннан көтеріп келе жатқан кәсіпкерлікті қолдау, әділ бәсекелестік орнату және мемлекеттік басқарудағы ашықтық қағидаларымен сабақтасып жатыр.

Бағдарламаның мазмұнына назар аударсақ, бірнеше стратегиялық бағыт айқын көрінеді. Біріншіден, саяси реформалар. Мұнда жемқорлықпен күрес, бюрократиялық кедергілерді азайту, монополияларды шектеу және мемлекеттік институттардың халық алдындағы жауапкершілігін күшейту мәселелері қамтылған. Бұл бағыттар соңғы жылдары қоғамда жиі көтеріліп жүрген талаптармен үндеседі. Экономиканың тұрақты дамуы мен инвестициялық ахуалдың жақсаруы да дәл осы факторларға тәуелді екені халықаралық тәжірибеде талай рет дәлелденген.

Екіншіден, әлеуметтік саясат ерекше назарға алынған. Партия сапалы білім беру жүйесін дамытуға, медициналық қызметтің қолжетімділігін арттыруға, жаңа жұмыс орындарын ашуға және тұрғын үй мәселесін шешуге басымдық береді. Әсіресе азаматтарды жалғыз баспанасынан айыруға заң жүзінде толық тыйым салу туралы ұсыныс әлеуметтік әділеттілік қағидатын күшейтуге бағытталған бастама ретінде көрінеді. Сонымен қатар жас отбасылар мен жастарды қолдау мәселесінің жеке бағыт ретінде көрсетілуі демографиялық және әлеуметтік саясаттың өзара байланысын аңғартады.

Экономикалық бөлімнің өзегі – шағын және орта бизнесті дамыту. Бұл кездейсоқ таңдау емес. Әлемдік тәжірибеде дәл осы сектор жаңа жұмыс орындарының басым бөлігін құрып, экономиканың тұрақтылығын қамтамасыз етеді. Қазақстанда да кәсіпкерлікті дамыту экономиканы әртараптандырудың негізгі тетіктерінің бірі ретінде қарастырылады. Сондықтан бизнестің дамуына кедергі келтіретін әкімшілік тосқауылдарды азайту, әділ бәсекелестік орнату және кәсіпкерлердің құқықтарын қорғау мәселелері бағдарламаның маңызды бөлігіне айналған.

Сыртқы саясат жөніндегі ұстаным да назар аудартады. Партия халықаралық қатынастарда ең алдымен Қазақстанның ұлттық және экономикалық мүддесін қорғауға негізделген прагматикалық бағытты қолдайтынын мәлімдеді. Қазіргі геосаяси жағдайда мұндай тәсіл мемлекеттердің сыртқы саясатындағы кең таралған модельдердің бірі саналады. Экономикалық байланыстарды сақтай отырып, ұлттық қауіпсіздік пен егемендікті басты орынға қою көптеген елдердің сыртқы саясатында басымдыққа айналып отыр.

Науқанның алғашқы күні кандидаттардың халық арасына шығып, Алматы тұрғындарымен тікелей кездесуі де саяси коммуникацияның маңызды элементі болды. Үгіт материалдарын тарату ғана емес, азаматтардың пікірін тыңдау және ашық диалог жүргізу партияның сайлауалды жұмысының негізгі әдістерінің бірі ретінде көрсетілді. Мұндай кездесулер сайлаушылардың нақты мәселелерін анықтап, қоғамдық сұранысты бағалауға мүмкіндік береді.

Жалпы алғанда, «Ақ жол» демократиялық партиясының сайлауалды науқаны бірнеше маңызды ерекшелікті көрсетті. Біріншіден, республиканың барлық өңірін қамтитын ұйымдасқан құрылым. Екіншіден, нақты әлеуметтік-экономикалық мәселелерге негізделген бағдарламалық ұсыныстар. Үшіншіден, азаматтармен тікелей байланыс орнатуға басымдық беру.

Сайлау науқаны енді ғана басталды. Алдағы апталарда партиялардың бағдарламалары қоғам тарапынан кеңінен талқыланып, олардың жүзеге асу мүмкіндігіне баға беріледі. Бұл тұрғыдан алғанда, «Ақ жол» ұсынған бастамалардың тиімділігі тек олардың мазмұнымен ғана емес, сайлаушылармен жүргізілетін ашық әрі мазмұнды диалогтың сапасымен де өлшенеді. Өйткені кез келген саяси бағдарламаның басты өлшемі – оның қоғамның нақты сұранысына жауап бере алуы және елдің ұзақ мерзімді дамуына нақты үлес қосуы.

Азамат Тасқараұлы,

Қазақ үні