АҚЫНДЫ АРЫСТАН БАП ЕЛІНЕ АЛЫП КЕТТІК

Ақиық ақын Мұқтар Шаханұлы ағамызды арнайы чартер ұшақпен алып кетіп барамыз киелі Түркістан мен Отырар, қасиетті Арыстанбап еліне.  

Алматы халқы, асқар Алатау асқақ ақынын қимай шығарып салды…

Әлемге әйгілі қазақтың ұлы ақыны, Тұран тұлғасы, Қазақстанның Еңбек Ері, Қазақстанның Халық жазушысы Мұқтар Шаханұлының ақырғы аманаты орындалатын болды құдай қаласа.

Марқұмды бүгін 21 сәуірде Алматы қаласындағы Абай атындағы опера және балет театрында қалың ел құрметтеп, қоштасып, шығарып салды.  

Сағат 12:00-де Ақынды туған жеріне алып ұшқан аппақ ұшақ Түркістан әуежайына сағат 13:05-те қонды. Әуежайдан Түркістан облысы әкімі Нұралхан Көшеров бастаған топ күтіп алып, қаралы көш қасиетті Отырарға жол тартты.

Туған жері Шілік ауылындағы үйіне түнетеді. Ертең 22 сәуірде сағат 10:00-де жаназасы оқылады.

Ақын ата-бабасы жатқан қасиетті Арыстан бап кесенесі маңындағы зиратқа жерленеді.

Талай жыл Халықаралық “Қазақ тілі” қоғамын басқарған айтулы академик, Алаш ардағы Өмірзақ Айтбайұлы мен сатира сардары Көпен Әмірбек тб белгілі ұлт зиялылары сол қорымға жерленген.

Пейіште рухы шалқи бергей!

Қазыбек ИСА, ҚР Парламенті Мәжілісінің депутаты