Бас мүфти: Марқұмдардың әруағына құран бағыштауға шариғатымызда рұқсат етілген

Бас мүфтидің осы дұрыс айтылған сөзіне қарсы шыққан Балғынбек бабасының “Алла оңдасын, әруақ қолдасын!”- деп өткенін ұмытып қалса керек…

Қазақстан мұсылмандары діни басқармасының төрағасы, бас мүфти Наурызбай қажы Тағанұлы кейбір діншілдер қарсы шыққан «әруақ қолдасын» деген ұлт танымына сай сөзге қатысты тоқ етерін айтты, деп хабарлайды Qazaquni.kz. 

Бұған дейін отандық телеарналардың бірінде Астанадағы бас мешітте өткен ақсақалдар арасындағы І республикалық бата беру байқауында бас мүфти «әруақ» сөзін аз қолдану керек, ал реті келсе, мүлдем қолданбау қажет» деп айтқаны көрсетілген. Бірақ кейіннен діни басқарманың баспасөз хатшысы Ағабек Қоңарбайұлы «Бас мүфтидің дұға жасау әдептеріне қатысты айтқан сөзі эфирден толық берілмей қалған. Осыған байланысты әлеуметтік желі қолданушылар түрлі пікір жазылып жатыр» деген болатын. Бас мүфтидің өзі мешітте осының нүктесін қойып, видеоүндеу жолдады. 

«Қазақы дүниетанымда әруақты құрметтеу, марқұмдардың әруағына құран-дұға бағыштау, әруақ қолдасын, желеп-жебеп жүрсін дегеннің барлығы шариғатымызда рұқсат етілген, шариғатымыз тыйым салған дүниелер емес. Мұны жақсы түсінуіміз керек», - дейді бас мүфти.

Ол қазақ халқында рухты әруақ сөзімен атап, оны ерекше қасиетті ұғым ретінде бағалаған деп айтты. 

«Әсіресе, дүниеден өткен ғалым, ғұлама, әулиелердің әруғын қастерлегені баршамызға белгілі, асыл дінімізде «Тәуәссул» деген ұғым бар. Бұл сөздің тілдік тұрғыдағы мағынасы қандай да бір мақсатқа жету үшін белгілі бір құралды себеп ету. Шариғат ғалымдарды «Тәуәссулды» өзгеден дұға тілеп, Алла тағалаға жақындау деп түсіндірген», - дейді Наурызбай қажы Тағанұлы.

Сондай-ақ Мұхаммед пайғамбарды тірі кезінде де, қайтыс болған соң да «Тәуәссул» жасап, дұға тілеуге рұқсат етілгенін айтты.

«Хадистерде ғалымдарымыз айтады, адам баласы қайтыс болған соң, ұрпақтарының жақсылығымен қуанады. Арттағы ұрпақтары бір қателік жасап, күнәға батса ұялады. Қуанған ата-аналар балалары үшін дұға етеді. Қазақ халқы «әруақ желеп-жебей жүрсін» дейді. Мінекей, мұның бәрі шариғатта негізі бар дүниелер», - дейді бас мүфти.

Ал енді Бас мүфтидің бүкіл жұрт қолдап жатқан «Әруақ қолдасын» деп айтқан сөзіне алдымен айтыскер Балғынбек Имашев қарсы шығып, мұны «Аллаға серік қосу» санайтынын жеткізіп, сол үшін қызметтен кетуін талап етіпті. Шамасы, Балғынбек бабасының “Алла оңдасын, әруақ қолдасын!”- деп өткенін ұмытып қалса керек…

М. Құрманбаев