"ҚАЗАҚ ҮНІ" - ҚАЗАҚСТАНДАҒЫ ҮЗДІК ИНТЕРНЕТ САЙТ БАЙҚАУЫНЫҢ ЖЕҢІМПАЗЫ!!!

ЖАРАЙСЫҢ, ЖАНСАЯ!

Италияда өткен соңғы әлем чемпионатында қазақстандық шахматшы қызымыз Жансая Әбдімәлік 20 жасқа дейінгі жастар арасында жеңімпаз атанды. 17 жастағы отандасымыз осыған дейін жасөспірімдер арасында күміс және қола медаль жеңіп алған болатын. Әлем чемпионатының алтыны бұйырды.

Жансая бұл жолғы аса тартысты өткен әлем чемпионатында он бір ойын өткізіп, тоғызында жеңіске жетті. Бір ойында тең түсіп, бір ойында жеңілді. Нәтижесінде 9,5 ұпай жинап, әлем чемпионы атанды. Cоңғы турда америкалық шахматшы Дженнифер Юмен кездесіп, жеңіске жетті.
Бірінші турда Жансая осы жылы оқушылар арасында өткен әлем чемпионатында күміс жүлдеге ие болған отандасымыз Назерке Нұрғалимен кездесіп, жеңіске жетті. Екінші турда армян Сирануш Гукасяннан айласын асырды. Үшінші турда үндістандық Вайшалиден ұпай алды.Төртінші турда Жансая украиналық Юлия Осьмакпен тең түсіп қалды. Кейіннен Номин-Эрдене Даваадемберель (Моңғолия) мен Нино Хомерикиді (Грузия) ұтты. Сондай-ақ Жансая Қазақстаннан Ресейге кеткен Бибісара Асаубаевамен де ойнап, айласын асырды.
Жансая жарыста сегізінші турда ресейлік шахматшы Анастасия Парамзинаға есе жіберіп алды. Бұл жеңіліс Жансаяны жаңа жеңістерге жетелеп, намысын қайрай түскендей болды. Одан кейінгі турларда қазақ қызы өзбекстандық Гүлрухбегім Тохиржанованы, грекиялық Ставрула Цолакидуды ұтты.
Айта кетейік, 20 жасқа дейінгі шахматшылар арасындағы әлем чемпионаты Италияның Тарвизио қаласында өтті. Жарысқа осы жас аралығындағы әлемнің бірыңғай мықты шахматшылары қатысты.
Жансая Әбдімәлік қыздар арасында төрт дүркін әлем чемпионы. Қазіргі таңда Top 100 Women November 2017 рейтингінде 40-орында тұр.
Қуантарлығы, Қазақстан шахмат спортында біздің қыздар ерлеп тұр. Жеңістің туын желбіреткен қыздардан жігіттеріміз де үлгі алатын уақыт жетті. Өткен жылы 20 жасқа дейінгі шахматшылар арасында отандасымыз Динара Сәдуақасова да әлем чемпионы атанған еді.

qazaquni.kz





1 пікір жазылған

Пікір жазу
  1. Ш.З.Д. 6 Желтоқсан, 2017, 08:52

    Жарайсың, ЖАНСАЯ айналайын! Жұлдызың әрқашанда оңынан туып, жарқырап төрткұл әлемге сәулесін түсірсін!
    Жасай бер, ҚАЗАҚТЫҢ ҚЫЗЫ!
    Біз Сені мақтан тұтамыз!

    Жауап жазу

Пікір жазу

Сіз не дейсіз?
*