"ҚАЗАҚ ҮНІ" - ҚАЗАҚСТАНДАҒЫ ҮЗДІК ИНТЕРНЕТ САЙТ БАЙҚАУЫНЫҢ ЖЕҢІМПАЗЫ!!!

Шекара бекеттеріне қазақ батырларының атын беру керек

Елбасы өзінің «Болашаққа бағдар: рухани жаңғыру» атты бағдарламалық мақаласында: «Жаңа тұрпатты жаңғырудың ең басты шарты – ұлттық кодыңды сақтай білу. Онсыз жаңғыру дегеніңіздің құр жаңғырыққа айналуы оп-оңай», – деп атап көрсетті.

Біздің батыр бабаларымыз аумағы жөнінен әлемде тоғызыншы орынды алатын, о шеті мен бұ шетіне құлан жортса тұяғы тозатын, қыран ұшса қанаты талатын ұлан-ғайыр жердің шебін ғасырлар бойы қанын төксе де, арын төкпестен, жанқиярлықпен қорғады. Бүгінгі бейбіт заманда Ұлы Даламыздың шебін қорғаушы жауынгер-шекарашылар да сол батыр бабаларымыздың бүгінгі буыны болып табылады.

Бүгінде 5 мемлекетпен шектесетін және жалпы ұзындығы 15 мың шақырымдай болатын шекарамызда 300-ге жуық шекара заставасы құрылған. Осы заставаларға сан тараптан сұқтанған жат жұртқа Атамекеннің қарыс қадамын да ұстатпай, ұрпағына толық мирас еткен батыр бабаларымыздың атын берсек, орынды болар еді.

Мұның ұлағатты үлгісі де бар. 2017 жылдың 3 сәуірінде қабылданған №157-ші Үкімет қаулысына сәйкес, Өзбекстанмен арамыздағы шекарадағы Қызылорда шекара отрядының 2019-шы әскери бөлімінің «Қызылқұм» шекара заставасы Жанқожа батырдың атымен қайта аталды. Осының алдында, 2014 жылы Қызылорда облысының Қазалы ауданында өткен, Жанқожа Нұрмұхаммедұлының 240 жылдығына арналған республикалық ауқымдағы іс-шара барысында Қызылқұмдағы шекара бекетіне батырдың есімін беру бастамасын көтерген болатынмын. Бұл бастама жүзеге асты және бұл Қазақстанның Шекара қызметі құрамындағы оныншы атаулы застава болып отыр.

Бұл біріншіден, ел шебі мен ұлттық қауіпсіздікті қорғаушы шекарашыларымызды дархан далаға қалқан болған батыр бабалардың ұлы рухында, Мәңгілік елдің мақсат-мұратында тәрбиелеуге үлес қосады.

Екіншіден, Қазақстан тарихында ерекше орын алар тұлғалардың атын мәңгі қалдыруға қызмет етеді.

Үшіншіден, Елбасы рухани жаңғырудың «Туған жер» бағдарламасы аясында ұсынғандай, бұл «есімдері ел есінде сақталған біртуар перзенттері» арқылы жас ұрпақтың туған жер тарихын тануына ықпал жасайды.

Төртіншіден, батыр бабалар атымен аталған шекаралық заставалар – өзге мемлекеттер азаматтарына Қазақстанды әз тарихын және ер ұландарын ұлықтайтын, ұмытпайтын, солардың биік рухымен рухтанатын өр әрі өркенді ел ретінде көрсетіп тұрады.

Бесіншіден, бұл меценаттарды шекаралық заставаларға көмек көрсетіп, қамқорлық жасауға тартуға жол ашады. Өйткені шекарашылар өз қызметі үшін қажеттінің барлығымен қамтамасыз етілгенімен, шекаралық заставалардың көбі кеңес заманында тұрғызылған және материалдық-техникалық базасы тоза бастаған.

Жоғарыда айтылғанды ескере отырып, енді Бөгенбай, Қабанбай, Қарасай, Наурызбай, Ер Жәнібек, Райымбек, Жалаңтөс Баһадүр және басқа да байырғыдан бергіге дейінгі батырларымыздың есімдерін еліміздің әр өңіріндегі шекара заставаларына беру мәселесін қарастыру керек. Қазақстанның ежелгі және кейінгі тарихындағы ұлы тұлғаларды ұлықтау ұлттық сананы жаңғыртуға бағытталған маңызды қадамға айналары анық.

Бақытбек Смағұл,

(Депутаттық сауал)

Abai.kz





3 пікір жазылған

Пікір жазу
  1. Шолпан 10 Қазан, 2017, 16:08

    Бақытбек Смағұлдың көтеріп отырған бастамасы өте керемет.Кереметтігін айтайын десем Бақытбек азаматтың өзі-ақ айшықтап тұрып көрсеткен екен. Енді бұл бастаманы іліп әкететін Ұлтшылдар табылса нұр үстіне нұр болар еді. Мысалы шынында да «Қаракерей Қабанбай атындағы шекаралық застава», «Ер Жәнібек атындағы әскери бөлім» деген сияқты атаулар әрбір сарбаздың жүрегіне рух берер еді. Тамаша!!! Азаматтар, Сіздерден сұрайтыным, осы бастамаға үн қосып, игілікті іске асырсаңыздар екен.

    Жауап жазу
  2. Алтай 11 Қазан, 2017, 21:10

    Бұл дұрыс ұсыныс. Бірақ, Жамбыл облысының Қырғыз елімен шекарасынды Сыпатай батыр заставасы, пропускной пункті бар екенін интернеттен оқып қайран қалдым. Шекараны күзету қорған бекетін еліміздің азаттығы үшін күрескен ханымызды сатып кеткен адамның атына қалай берген? Қазіргі сарбаздарға осы Сыпатайша «қорғаңдар» деп айта ма? Қиын жағдай болып бара жатса, тастап шыға бересіңдер дей ме? Кім осы атты берген? Әлде бұл дұрыс та, менікі қате ме?

    Жауап жазу
  3. Қалеке 26 Қазан, 2017, 23:01

    Алмағайып заманда,сыртқы күштердің әсерінен алауыз болған қазақ қоғамының өмір сүрген тұсындағы жағдай,анау мынау деп, біржақты,үстірт баға беруге әсте болмайды, Сыпатай бір қауым елдің ардақтысы, тегін қойылған жоқ..

    Жауап жазу

Пікір жазу

Сіз не дейсіз?
*