Валюта бағамы USD : 333.53 | EUR : 392.1 | CNY : 50.4

"ҚАЗАҚ ҮНІ" - ҚАЗАҚСТАНДАҒЫ ҮЗДІК ИНТЕРНЕТ САЙТ БАЙҚАУЫНЫҢ ЖЕҢІМПАЗЫ!!!

Алматының жолдарын жөндеуге 7 миллиард теңге бөлінді

Қай заманда да қала салудың көрінісі көшесін айқындап, жолын төсеуден бай­қалған. Тарих қойнауынан табылған, талай ғасыр бұрынғы тарихтың куәсі болған шаһарларды топырақтан аршып, қазба жұмыстарын жасағанда бірінші болып көшелері бедерленіп, осы жерде қала болған деп тұрады. Жаһанның басқа жағын айтпай-ақ, өзіміздің сайын даламызда Тараз, Сарайшық, Түркістан, т.б. шаһар­ларды айтсақ та жетеді. Ал мың жылдық тарихы бар, Ұлы Жібек жолының бойын­дағы көне Алмалық шаһарының ізі – бүгінгі Алматы қаласы. Талай тарихты басынан көшірген Алматы жиырма бірінші ғасырда әлемнің айтулы мегаполисте­рінің қатары­нан көрінгісі келеді.

Бауыржан Байбек   көш­пе­лі жиын бары­сында аудан­дар әкімдері мен басқар­­малар басшыларының  наза­рын екі маңызды  мәселеге – жұмыс­тың сапасы мен уақ­тылы   орындалуына   аударды.

Биылғы жылы  120 шақы­рымнан астам жол орташа жөнделіп, 85 мың шаршы метр тротуарлар мен 130 аялдама  алаңдары  салынады деп жос­парланған. Жол-жөндеу жұмыс­тарына 7 млрд. теңге, оның ішінде кезекті жөндеуге 1 млрд. теңге,  тротуарлар мен аялдама орындарын  ретке келтіруге 500 млн. теңге,  орташа жөндеуге 5,5 млрд. теңге бөлінген.

– Бірінші кезекте жалпы ұзындығы 37 шақырым болатын 34 көшеге, соның ішінде, 12 магистральды көше мен 23  аудан­дық маңызы бар көшеге жөндеу жұмыстары жүргізіледі. Атап өтерлік жәйт, ұзындығы 31 шақырым болатын 19 көшеге де орташа жөндеу жүргізудің сметалық құжаттары жасалды. Қала көшелеріндегі ақауларды тауып әрі жөндеу үшін 4 мер­дігерлік ұйым мен 12 бригада жұмыс істеу­де,  осы аптаның ішінде бұлардың саны 28-ге  артатын болады, – дейді Жо­лаушылар көлігі және автомобиль  жол­дары бас­қармасының басшысы Мақсұт Исахов.

Басқарма басшысы Саин көшесінен Жандосов көшесінің бойымен Таусамалы  поселкесіне дейін күрделі жөндеу жұмыстарының жүріп жатқанын айтты. Жөнделетін аумақтың жалпы ұзындығы 2,08 шақырым. Жоба құны – 1 134,0 миллион теңге. Жөндеу жұмыстары бары­сында жолдың көлік қозғалысы бөлігі 4 жолаққа дейін кеңейеді, Қарғалы өзенінің бойындағы  көпір қайта жасалады, вело­жолдар мен тротуарлар салынады.

Атап өтерлік жәйт, жолдарды жөндеу жұмыстарында заманауи техника пайда­ла­­нылады. Асфальт  төсейтін   жаңа ма­шина 8 тонна асфальт дайын­дап, оның темпера­турасын 180 градуста сақтай алады.  Бұл техни­каның  ерек­шелігі – ол қыс кезінде  де жолдарды жөн­дей береді. Бұл  техника  Қа­зақстанда біреу ғана. Бола­шақта  осын­дай бірнеше тех­ни­ка сатып алу жоспар­лануда.

Өзінің кезекті жұмыс сапары бары­сында Бауыржан Байбек қалалық инженер­лік коммуникацияларды жаңарту жұмыстарын да тексеріп көрді. Энергетика және коммуналды шаруашылық басқар­масының басшысы Ермек Үсенбаев биылғы жылы 172 қазу жұмы­сының жүргізілетінін баян­дады. Жұмыстардың барлығы тұтынушыларды электрден, жылудан, судан ажыратпай, жүзеге асы­рылады.  Бақылауға  алынған 66  қазылған  ордың жыл қоры­тындысы бойынша 40-ы  бұрынғы  қалпы­на келтірілді, 26-сы өтпелі. Арнайы құрыл­ған жұмысшы  тобы 30 нысаннан ақау тапты. Мердігерлерге сәуір айының соңына дейін барлық ақауларды  жою туралы тапсырма берілді.

Нұрлан СҮЙІН,

«Алматы ақшамы»





Пікір жазылмаған

Пікір жазу
Әлі ешкім пікір жазған жоқ! Бірінші болып пікір жазыңыз!

Пікір жазу

Сіз не дейсіз?
*